С.Аманжолов атындағы ШҚУ Физика және технологиялар кафедрасының қауымдастырылған профессоры Мұхамедолла Ағзамов Біріккен Араб Әмірліктерінің Дубай қаласында өткен Азия чемпионатынан жеңіспен оралды.

Ардагерлер арасында армрестлингтен Азия құрлығын мойындатқан қол күресші ауыр салмақта (90+ келі) сол қолда бірінші, оң қолда екінші орын иеленді. Көп ұзамай 4-9 мамыр аралығында Қырғызстан астанасы Бішкекте гір көтеру спортынан ардагерлер арасында Азия чемпионатында топ жарды. 85+ келі салмақ дәрежесінде ең үздік нәтижеге қол жеткізіп, халықаралық дәрежедегі спорт шебері нормативтерін орындады.